Abagize Urugaga rw’abakorera PSF mu Ntara y’Amajyaruguru, barifuza ko hashyirwaho icyanya cyahariwe imurikagurisha, kubera ko abikorera bamaze gusobanukirwa n’akamaro ko kumurika ibyo bakora ari nako abitabira Ibikorwa by’imurikagurisha bagenda baba benshi.
Ibi Umuyobozi w’Urugaga rw’Abikorera (PSF) mu Ntara y’Amajyaruguru, Tugengwenayo Theonas, yabisabye Umuyobozi w’Intara y’Amajyaruguru Mugabowagahunde Maurice ubwo bari mu birori byo gusoza ku mugaragaro imurikagurisha ry’iminsi 15 ryateguwe n’urugaga rw’abakorera PSF mu Ntara y’Amajyaruguru.
Ni Imurikagurisha ryatangiye tariki 19/08/2026 risozwa kuri 02/09/2026 aho ryitabiriwe n’abikorera batandukanye baturuka mu turere tunyuranye tw’Intara y’amajyaruguru, hamwe no muzindi Ntara n’umujyi wa Kigali, ndetse no mu bihugu bya Afurika.
Tugengwenayo Théonas Umuyobozi w’urugaga rw’abikorera PSF mu Ntara y’Amajyaruguru yagize ati:”Turifuza kubona icyanya cyihariye cyateguriwe igikorwa nk’iki, Kandi bizaba ari byiza dukurikije Aho iterambere ry’akarere ndetse n’uyu mujyi riri kugana”.
Yakomeje avuga Kandi ko urugaga rw’abikorera rwizeza ubuyobozi bw’ Intara y’Amajyaruguru kuba umufatanyabikorwa mwiza mu guhindura ubukungu barushaho gukora ishoramari ritanga umusaruro, guhanga imirimo, ndetse no gutanga serivisi nziza ari nako baharanira gukora no gucuruza ibifite ubuziranenge.
Ni ikifuzo cyakiriwe neza n’umuyobozi w’Intara y’Amajyaruguru Bwana Mugabowagahunde Maurice wari witabiriye ibi birori byo gusoza kumugaragaro iri murikagurisha nkuko na none yanabyitabiriye mu kurifungura, maze avuga ko ari igitekerezo cyiza kandi bashyigikiye ko iki cyanya kigomba kuboneka mu gishushanyo mbonera cy’uyu mujyi wa Musanze.
Yagize ati:”Ni igitekerezo natwe twari tumaze iminsi twifuza ko twagira ahandi dukorera kandi hisanzuye hagenewe imurika gusa, Kandi twatangiye kubivugana n’ubuyobozi bwa PSF ku rwego rw’igihugu rero badusezeranyije ko mu gihe cya vuba baratwoherereza ikipe idufasha mu gutegura inyigo natwe dufatanyije n’ubuyobozi bw’akarere ka Musanze tukaba twaratangiye gutekereza aho twashyira iyo site.”
Uyu muyobozi kandi yongeyeho ko ubu bamaze kurambagiza ahantu nka hatatu cyangwa hane batekereza gushyira iki cyanya, kandi ko bitazatinda kuko babisabye nabo bari babifite mu bitekerezo, ndetse ashimangira ko icyifuzo ari uko mu myaka ibiri iri imbere iki cyanya kizaba cyamaze kuboneka bitewe n’uko na Sitade ikorerwamo Expo uyu munsi nayo izaba irimo kwimurwa.
Ni inkuru nziza kandi yumvikanye neza mu matwi y’abikorera bakomeje kugaragaza isura nziza y’umujyi wa Musanze, aho Habiyambere Jean Uhagarariye Samsung 250 akaba n’ Umuyobozi wa PSF mu karere ka Musanze yavuze ko bifuza kubaka icyanya cyiza kandi kigezweho kijyanye n’igihe kuburyo ngo abamurika bazajya baza bashyiramo ibintu byabo gusa muri Stands ntakindi bakoze cyo kubaka.
Iri murikagurisha ry’abikorera mu Ntara y’Amajyaruguru ribaye nshuro ya 16, aho ryitabiriwe n’abamurika bagera kuri 212, barimo abanyarwanda195, abanyamahanga 17 baturuka mu bihugu bitandukanye by’ Afurika Aho bamuritse ibikorwa by’inganda, ubuhinzi n’ubworozi, ubukorikori, ikoranabuhanga, imyidagaduro, utubari na resitora ndetse na serivisi za leta zirimo gufotora abazahabwa indangamuntu y’ikoranabuhanga.
RAFIKI Kabenga
Rwandatribune.rw
