Urukiko Rukuru rwa Gisirikare muri Repubulika Iharanira Demokarasi ya Congo (RDC) rwasoje ku wa 22 Nzeri 2026 i Kinshasa iburanisha mu rubanza rwa Lieutenant-General Philémon Yav Irung, ushinjwa ibyaha birimo ubuhemu ku gihugu no kugira uruhare mu bikorwa byo kwigomeka ku butegetsi.
Mu ijambo ryarwo risoza impaka, Ubushinjacyaha bwa Gisirikare bwamaganye zimwe mu ngingo zatanzwe n’abunganira uregwa, cyane cyane ku buryo mugenzi we bareganwa, Shauri Chibogo Issa, yakorewe, agaciro k’ibyo yavuze ndetse n’uburyo ingingo ya 182 y’Igitabo cy’Amategeko Ahana cya RDC ikwiye gusobanurwa.
Ubushinjacyaha bwakomeje kuvuga ko ibimenyetso n’amakuru byakusanyijwe mu gihe cy’iperereza bishimangira ibyo bwari bwasabye urukiko.
Ku ruhande rw’abunganira Philémon Yav, banze iyi myumvire y’Ubushinjacyaha, bavuga ko ibyo bwashingiragaho bidafite ishingiro.
Banamaganye kandi uburyo Ubushinjacyaha bwahinduye ibisobanuro by’ingingo ya 18 y’Itegeko Nshinga rya RDC.
Nyuma yo kumva impande zombi, Urukiko Rukuru rwa Gisirikare rwasoje iburanisha, ubu rukaba rugiye gusuzuma ibikubiye muri uru rubanza, ibimenyetso n’impaka zatanzwe n’impande zombi mbere yo gutangaza umwanzuro warwo.
Urukiko rwatangaje ko ruzatanga icyemezo cyarwo mu gihe giteganywa n’amategeko.
Kugeza ubu, nta mwanzuro wa nyuma uratangazwa kuri ibi byaha Philémon Yav akurikiranyweho.
Ibyo Ubushinjacyaha busaba urukiko nabyo ntibivuze ko uregwa yahamijwe ibyaha, kuko icyemezo cya nyuma ari icy’Urukiko.
Rwandatribune.rw
