U Rwanda rwatorewe ku bwumvikane kuyobora Umuryango w’Ibihugu 77 n’u Bushinwa, uzwi nka G77+China, mu mwaka wa 2027.
Iki cyemezo cyafashwe ku wa 25 Nzeri 2026, mu nama ya 50 y’Abaminisitiri b’Ububanyi n’Amahanga b’ibihugu bigize G77+China yabereye ku cyicaro cy’Umuryango w’Abibumbye i New York muri Leta Zunze Ubumwe za Amerika.
U Rwanda ruzasimbura Uruguay iri ku buyobozi bw’uyu muryango muri uyu mwaka wa 2026.
Minisitiri w’Ububanyi n’Amahanga n’Ubutwererane Mpuzamahanga w’u Rwanda, Olivier Nduhungirehe, ni we watangaje ko u Rwanda rwemeye izi nshingano, ashimira ibihugu bigize G77+China kuba byaragaragaje icyizere mu Rwanda.
Kandidatire y’u Rwanda yari ishyigikiwe n’ibihugu bya Afurika, ndetse rwemejwe nta kindi gihugu giharanye narwo.
Icyemezo cyo kurutora cyafashwe ku bwumvikane n’ibihugu bigize uyu muryango.
G77+China ni ihuriro ry’ibihugu bikiri mu nzira y’amajyambere rifite uruhare rukomeye mu biganiro mpuzamahanga, cyane cyane ibibera mu Muryango w’Abibumbye.
Nubwo ryitwa G77, kuri ubu rigizwe n’ibihugu 134. U Bushinwa bwo bufatanya n’iri huriro mu bikorwa n’ibiganiro bitandukanye, ari na yo mpamvu ryitwa G77+China.
Iri huriro ryashinzwe mu 1964, hagamijwe guhuriza hamwe ibitekerezo n’inyungu z’ibihugu bikiri mu nzira y’amajyambere, kugira ngo bigire ijwi rihuriweho mu biganiro mpuzamahanga.
Ibyo biganiro bikubiyemo ibijyanye n’ubukungu, iterambere, ubucuruzi mpuzamahanga, imari n’izindi gahunda zireba ibihugu bikiri mu nzira y’amajyambere.
Mu gihe cy’umwaka umwe ruzamara ku buyobozi, u Rwanda ruzaba rufite inshingano zo guhuza ibihugu bigize G77+China no kubihagararira mu biganiro bitandukanye bya Loni, cyane cyane ku bibazo bireba ibihugu bikiri mu nzira y’amajyambere.
Minisitiri Nduhungirehe yavuze ko u Rwanda ruzakorana bya hafi n’ibihugu byose bigize iri huriro, hagamijwe guteza imbere inyungu bihuriyeho.
Ubuyobozi bw’u Rwanda buzanabera mu gihe ibihugu byo mu majyepfo y’isi bikomeje gushyira imbere ibiganiro ku iterambere rirambye, imihindagurikire y’ikirere, ubucuruzi mpuzamahanga, ikoranabuhanga ndetse n’imari igenewe iterambere.
U Rwanda ruzatangira ku mugaragaro kuyobora G77+China muri Mutarama 2027, nyuma y’uko Uruguay isoje manda yayo mu mpera za 2026.
Kuyobora iri huriro bizaha u Rwanda inshingano zo guhuza ibitekerezo by’ibihugu 134 bigize G77+China no kubihagararira mu biganiro bikorerwa mu rwego rw’Umuryango w’Abibumbye, cyane cyane ku ngingo zireba iterambere n’inyungu z’ibihugu bikiri mu nzira y’amajyambere.
Rwandatribune.rw
