Umuhuzabikorwa wa AFC/M23, Corneille Nangaa, yagaragaye yifatanyije n’abayobozi n’abaturage b’Umujyi wa Goma mu gikorwa cyo gutera ibiti kizwi nka “Goma Verte”, kigamije kubungabunga ibidukikije no kongera ubuso buteyeho amashyamba.
Nk’uko byatangajwe na Life UP TV, Nangaa yifatanyije n’Umuyobozi w’Umujyi wa Goma, Désiré Ngabo Kisuba, mu gikorwa cyabereye mu bice bitandukanye by’umujyi, aho hatewe ibiti hagamijwe guteza imbere gahunda yo kurengera ibidukikije no guhangana n’ingaruka z’ihindagurika ry’ikirere.
Amafoto yakwirakwijwe ku mbuga nkoranyambaga agaragaza Corneille Nangaa n’abandi bayobozi bambaye imyambaro y’icyatsi yateguriwe iki gikorwa, mu gihe bari batera ibiti ku mihanda ya Goma.
Iki gikorwa kibaye mu gihe AFC/M23 ikomeje kugenzura Umujyi wa Goma n’ibice bitandukanye byo mu Burasirazuba bwa Repubulika Iharanira Demokarasi ya Congo (RDC). Uyu mutwe umaze igihe uvuga ko, uretse ibikorwa by’umutekano, unashyize imbere gahunda zigamije guteza imbere imiyoborere, isuku, kubungabunga ibidukikije no guteza imbere ibikorwa remezo mu duce ugenzura.
Rwandatribune.rw
