Ikigo cy’Igihugu gishinzwe Ubutaka (NLA) cyatangaje ko kigiye gutangira kohereza ubutumwa bugufi (SMS) ku batunze ubutaka, bubamenyesha icyo ubutaka bwabo bwagenewe gukoreshwa nk’uko biteganywa n’igenamigambi ry’imikoreshereze y’ubutaka.
Iki cyemezo kigamije gufasha ba nyir’ubutaka kumenya neza inshingano bafite ku butaka bwabo no kubwifashisha mu buryo bwemewe n’amategeko, birinda kubukoresha mu buryo bunyuranyije n’icyo bwagenewe.
Nk’uko Ikigo cy’Igihugu gishinzwe Ubutaka cyabitangaje, ubu butumwa bugufi buzaba ari uburyo bwo gukomeza gukangurira abaturage kubahiriza igenamigambi ry’imikoreshereze y’ubutaka, kuko ari ingenzi mu guteza imbere imiturire itunganye, ibikorwa by’ubuhinzi, ubucuruzi n’ibindi bikorwa by’iterambere.
Abatunze ubutaka bazajya bahabwa ubutumwa bugaragaza niba ubutaka bwabo bwagenewe ubuhinzi, guturwaho, ibikorwa by’inganda, ubucuruzi cyangwa indi mikoreshereze yemewe.
Ibi bizabafasha gufata ibyemezo bijyanye n’ishoramari cyangwa ibikorwa bifuza kuhakorera, bazi neza icyo amategeko abyemera.
NLA yibukije ko gukoresha ubutaka mu buryo butandukanye n’ubwo bwagenwe bishobora gutuma nyirabwo ahanishwa ibihano biteganywa n’amategeko, birimo gucibwa amande cyangwa gutegekwa gusubiza ubutaka mu mikoreshereze wabwo wemewe.
Iki kigo gisaba abaturage kuzajya basoma neza ubutumwa bazoherezwa, bakabukurikiza, ndetse mu gihe hari ibyo badasobanukiwe bakegera inzego z’ubutaka zibegereye kugira ngo bahabwe ibisobanuro.
Iyi gahunda ije mu rwego rwo kongera imikoreshereze myiza y’ubutaka, kurengera igenamigambi ry’igihugu no gufasha abaturage gukoresha umutungo w’ubutaka mu buryo butanga umusaruro kandi bwubahiriza amategeko.
Rwandatribune.rw
