Umuryango wa Afurika Yunze Ubumwe (AU) wasabye impande zitandukanye muri Repubulika Iharanira Demokarasi ya Congo (RDC) kwirinda ibikorwa bishobora kurushaho gukaza umwuka mubi wa politiki n’umutekano, ushimangira ko ibiganiro by’amahoro ari byo bikwiye guhabwa umwanya wa mbere.
Mu itangazo ryasohowe ku wa Kabiri, tariki ya 20 Ukwakira 2026, Perezida wa Komisiyo ya AU, Mahmoud Ali Youssouf, yashimye imbaraga Perezida wa RDC, Félix Tshisekedi, ari gushyira mu gushaka uburyo habaho ibiganiro bya politiki by’igihugu bihuza impande zitandukanye.
Ibyo biganiro bigamije guhuza abanyapolitiki n’abandi bafatanyabikorwa mu gihugu, hubahirizwa inzego zemewe n’Itegeko Nshinga rya RDC.
Mahmoud Ali Youssouf yibukije ko amahame shingiro ya AU yamagana impinduka z’ubutegetsi zinyuranyije n’Itegeko Nshinga, zirimo gufata ubutegetsi ku ngufu no guhirika inzego zashyizweho mu buryo bwemewe.
Yasabye impande zose zifite uruhare mu bibazo bya politiki n’umutekano muri RDC kwifata, kwirinda ibikorwa byongera ubushyamirane no kudakoma mu nkokora amahirwe yo kugera ku bwiyunge bw’igihugu.
Ubu butumwa buje mu gihe ishingwa rya Front pour la Refondation de la Nation (FRN), iyobowe n’uwahoze ari Perezida Joseph Kabila, rikomeje guteza impaka ku ruhare rw’abatavuga rumwe n’ubutegetsi mu biganiro by’igihugu.
Nubwo AU itigeze igaragaza mu itangazo ryayo ko uruhande runaka ari rwo nyirabayazana w’ibi bibazo, yashimangiye ko inzira ya politiki igomba kubahiriza amategeko n’inzego z’igihugu.
AU yasabye impande bireba gukomeza kubahiriza ibyo ziyemeje mu biganiro by’amahoro bya Washington na Doha, kubahiriza agahenge no kurinda abaturage ingaruka z’intambara.
Yongeye kandi kugaragaza ko ishyigikiye umuhuza wa AU mu kibazo cya RDC, Faure Essozimna Gnassingbé, uyobora Inama ya Repubulika ya Togo, ufashwa n’itsinda ry’abafashamyumvire bo mu Muryango wa Afurika y’Iburasirazuba (EAC) n’Umuryango w’Iterambere ry’Ibihugu byo muri Afurika y’Amajyepfo (SADC).
Komisiyo ya AU yavuze ko yiteguye gukomeza gufatanya n’abo bafatanyabikorwa ndetse n’izindi nzego mpuzamahanga kugira ngo haboneke amahoro arambye muri RDC no mu karere k’Ibiyaga Bigari.
Icyakora, kuba hari ibiganiro n’amasezerano ntibihita bivuga ko intambara yahagaze.
Ishyirwa mu bikorwa ry’ibyemeranyijweho no kubahiriza agahenge ku mpande zose ni byo bizagaragaza niba inzira ya dipolomasi iri gutanga umusaruro.
Rwandatribune.rw
