Mu gihe abantu benshi bagenda bakora ingendo ndende, bakajya mu misozi cyangwa bakisanga ahantu hatari ubwiherero busukuye, hari igikoresho gito kiri gukundwa n’abagore kubera uburyo kibafasha kunyara bahagaze.
Iki gikoresho cyitwa GoGirl, gikozwe muri silicone yo mu rwego rw’ubuvuzi kandi cyagenewe guhuza n’imiterere y’umubiri w’umugore. Gifasha umugore kwihagarika adakeneye kwicara ku musarani, ibintu bishobora kugirira akamaro abakoresha ubwiherero budasukuye cyangwa abakunda ingendo.
Umwanditsi Alison Freer yavuze ko yabanje guhabwa GoGirl nk’impano isekeje n’umwe mu bo bakoranaga, ariko nyuma aza gusanga ari igikoresho cyamufashaga cyane.
Yavuze ko yakomeje kukitwarana aho yajyaga hose, akagikoresha mu bwiherero budasukuye, mu ngendo, mu ndege no mu bindi bihe kubona ubwiherero bwiza byabaga bigoye.
Abakora GoGirl bavuga ko igomba gushyirwa neza ku mubiri kugira ngo inkari zisohoke neza nta kumeneka. Basaba kandi ko umuntu yabanza kuyigerageza ari mu rugo kugira ngo amenyere uko ikoreshwa mbere yo kuyikoresha ahandi.
Nyuma yo kuyikoresha, GoGirl isukurwa n’amazi, igahanagurwa cyangwa ikarekwa ikuma mbere yo gusubizwa mu isakoshi. Nanone ishobora kozwa n’isabune nyuma yo gukoreshwa inshuro nyinshi kugira ngo ikomeze kugira isuku.
Abahanga mu buzima bavuga ko nubwo ibikoresho nk’ibi bishobora korohereza abagore mu bihe bimwe na bimwe, gukomeza kubahiriza isuku no gukaraba intoki bikiri ingenzi mu kwirinda indwara zishobora kwandurira mu bwiherero.
Mu bihugu bitandukanye, GoGirl ikomeje kwifashishwa n’abagore bakunda ingendo ndende, ibikorwa byo mu gasozi, gukambika cyangwa abashaka kwirinda gukoresha ubwiherero budafite isuku.
rwandatribune.rw
