Perezida wa Repubulika y’u Rwanda, Paul Kagame, yakiriye muri Village Urugwiro mugenzi we wa Bénin, Romuald Wadagni, watangiye uruzinduko rw’akazi rw’iminsi ibiri mu Rwanda.
Wadagni yageze mu Rwanda ku wa 16 Nzeri 2026, aho yakiriwe na Perezida Kagame.
Uru ruzinduko rwibanze ku gukomeza umubano usanzwe hagati y’ibihugu byombi no guteza imbere ubufatanye mu nzego zitandukanye.
U Rwanda na Bénin bifitanye imikoranire mu byerekeye ubucuruzi n’ishoramari, ikoranabuhanga, ubuhinzi, igenamigambi ry’imijyi, kuvugurura serivisi za Leta ndetse n’umutekano.
Mu 2023, ubwo Perezida Kagame yagiraga uruzinduko muri Bénin, ibihugu byombi byashyize umukono ku masezerano 10 agamije guteza imbere ubufatanye hagati yabyo. Muri ayo masezerano harimo iryo gukumira ikibazo cyo gusoresha kabiri.
Uruzinduko rwa Wadagni mu Rwanda rubaye nyuma y’amezi make atangiye kuyobora Bénin.
Yatorewe kuyobora icyo gihugu ku wa 12 Mata 2026, atsinda amatora ku majwi arenga 94%.
Ku wa 24 Gicurasi 2026 ni bwo Wadagni yarahiriye kuyobora Bénin, asimbura Patrice Talon wari usoje manda ebyiri ziteganywa n’Itegeko Nshinga ry’icyo gihugu.
Perezida Wadagni yatangiye manda y’imyaka irindwi nyuma yo kumara imyaka 10 ari Minisitiri w’Imari n’Ubukungu wa Bénin.
Nubwo ari ubwa mbere asuye u Rwanda nka Perezida, Wadagni yari asanzwe azi igihugu ndetse n’abayobozi bacyo.
Muri Nzeri 2023, ubwo yari akiri Minisitiri w’Imari n’Ubukungu, yaje mu Rwanda nk’intumwa yihariye ya Perezida Patrice Talon, ageza kuri Perezida Kagame ubutumwa bw’umukuru w’igihugu wari ushinzwe kuyobora Bénin icyo gihe.
Uruzinduko rwe rushya rubaye mu gihe u Rwanda na Bénin bikomeje kwagura umubano w’ibihugu byombi, hashingiwe ku bufatanye mu nzego zirimo ubukungu, ikoranabuhanga, imiyoborere n’umutekano.
Rwandatribune.rw
