Goma, 16 Nyakanga 2026 – Abasirikare bakuru bahagarariye Ingabo za Repubulika Iharanira Demokarasi ya Congo (FARDC) n’ihuriro AFC/M23 bahuriye ku wa Kane i Goma mu nama ya mbere y’Urwego Ruhuriweho rwagutse rw’Igenzura (MCVE+), rugamije kugenzura iyubahirizwa ry’agahenge hagati y’impande zombi, mu gihe buri ruhande rugikomeje gushinja urundi kurenga ku masezerano.
Iyi nama yabereye ku cyicaro cy’Urwego Rushinzwe Kugenzura no Gukurikirana Iyubahirizwa ry’Agahenge (COVM), yitabirwa kandi n’indorerezi z’Umuryango wa Afurika Yunze Ubumwe (AU) n’Ubutumwa bw’Umuryango w’Abibumbye bwo kubungabunga amahoro muri RDC (MONUSCO).
Ku ruhande rwa FARDC, abitabiriye iyo nama ni Lt. Col. Ben Epule Cosmas, Maj. Lokuli Bofanda Fredy na Maj. Kitoko Dimonekene André, bageze i Goma ku wa 13 Nyakanga bari kumwe n’Umuyobozi Wungirije wa MONUSCO, Vivian van de Perre.
MCVE+ yashyizweho hashingiwe ku masezerano y’agahenge yasinywe i Doha muri Qatar ku wa 14 Ukwakira 2025 hagati ya Guverinoma ya RDC na AFC/M23. Aya masezerano yari agamije guhagarika imirwano no gushyiraho uburyo bwo gukurikirana iyubahirizwa ry’agahenge mu rwego rwo gushyigikira ibiganiro bya politiki.
Impande zombi zongeye kumvikana ku mikorere y’uru rwego mu biganiro byabereye i Montreux mu Busuwisi muri Mata 2026. Uru rwego rufite inshingano zo kwakira no gusuzuma ibirego by’uko agahenge katubahirijwe, gukora iperereza no gutegura raporo zishyikirizwa abafatanyabikorwa b’ibiganiro by’amahoro.
MONUSCO izatanga ubufasha bwa tekiniki n’ibikoresho, birimo gutwara abagize uru rwego no gukoresha drones mu kugenzura uko agahenge kubahirizwa.
Nubwo ibikorwa bya MCVE+ bitangiye ku mugaragaro, Guverinoma ya Kinshasa na AFC/M23 bakomeje gushinjanya ibitero no kutubahiriza amasezerano y’agahenge, cyane cyane mu Ntara ya Kivu y’Amajyepfo. Uru rwego rutangiye akazi mu gihe impande zombi zitezweho kugabanya amakimbirane no kubaka icyizere gishobora gushyigikira ibiganiro by’amahoro.
Mwizerwa Ally
Rwandatribune.rw
