Ishyaka UDPS riri ku butegetsi muri Repubulika Iharanira Demokarasi ya Congo (RDC) ryateje impaka nyuma y’amagambo ya Fils Mukoko, umwe mu barwanashyaka baryo bakomeye, wavuze ko hateganywa gukwirakwiza intwaro mu bibuga by’umupira w’amaguru, mu nsengero no muri za kaminuza.
Mukoko yanaburiye Abanyaburayi bari i Kinshasa ko bashobora kugira ingorane zo kuva muri uwo mujyi, anasaba ko hategurwa imyigaragambyo ikomeye imbere ya Ambasade y’u Bubiligi muri RDC.
Mu magambo ye, Mukoko yagize ati: “Tugiye gukwirakwiza intwaro, no mu bibuga by’umupira w’amaguru. Tugiye gukwirakwiza intwaro no mu nsengero no muri za kaminuza. Abanyaburayi bari i Kinshasa bizabagora kuhava. Bazagorwa no kuhasohoka.”
Aya magambo aje mu gihe umwuka wa politiki muri RDC ukomeje kuzamo ubushyuhe, by’umwihariko nyuma y’amakuru y’ibikorwa byo gusaka byakorewe mu Bubiligi ahantu hafitanye isano n’abantu bo mu muryango wa Perezida Félix Tshisekedi.
Ibyo bikorwa byavuzwe ko bifitanye isano n’iperereza ku byaha bikekwa birimo kunyereza amafaranga no kwigwizaho umutungo mu buryo bunyuranyije n’amategeko.
Mukoko yasabye kandi ko Abanyekongo bigaragambya imbere ya Ambasade y’u Bubiligi i Kinshasa, mu gihe umubano n’impaka bikikije ibi bikorwa bikomeje gukurura ibitekerezo bitandukanye.
Ibyo yavuze ku gukwirakwiza intwaro n’ingorane Abanyaburayi bashobora guhura na zo byateje impungenge, bitewe n’ingaruka bishobora kugira ku mutekano w’abaturage n’abanyamahanga baba muri RDC.
Rwandatribune.rw
