Perezida wa Leta Zunze Ubumwe za Amerika, Donald Trump, yatangaje ko nta biganiro cyangwa imishyikirano iri gukorwa hagati ya Washington na Tehran, ndetse ko nta biganiro bishya biteganyijwe mu gihe umubano w’ibihugu byombi ukomeje kuba mubi.
Trump yabitangaje ku wa Kabiri, tariki ya 18 Kanama 2026, mu butumwa yanyujije ku rubuga rwe, aho yavuze ko Amerika ikomeje igikorwa cyo kubuza Iran gukoresha inzira zo mu nyanja. Yongeyeho ko, ku ruhande rwa Amerika, Inzira ya Hormuz ikomeje gufunguka kandi amato ashobora kuyinyuramo.
Trump kandi yavuze ko ibirombe byo mu mazi byari byashyizwe muri iyo nzira byakuweho cyangwa bigaturikizwa, ashimangira ko inzira ikomeye mu bucuruzi bw’ibikomoka kuri peteroli ikomeje gukora.
Yagize ati: “Nta biganiro cyangwa imishyikirano biri gukorwa cyangwa biteganyijwe na Repubulika ya Kisilamu ya Iran.”
Iran ivuga ko Hormuz igifunze
Ibyatangajwe na Trump binyuranye n’ibivugwa na Iran. Abayobozi ba Tehran bavuga ko Inzira ya Hormuz izakomeza gufungwa kugeza igihe Amerika yubahirije ibyo Iran isaba, birimo gukuraho ibihano by’ubukungu, guhagarika igikorwa cyo kuyibuza gukoresha ibyambu no kurekura umutungo wayo wafunzwe.
Nubwo Trump avuga ko iyo nzira ifunguye, amakuru y’ubwikorezi bwo mu nyanja agaragaza ko urujya n’uruza rw’amato rucye cyane ugereranyije n’ibihe bisanzwe.
Ibi byatumye impungenge zikomeza kwiyongera ku isoko ry’ingufu ku isi.
Ibiganiro by’amahoro byageze aharindimuka
Ibi bibaye nyuma y’uko igihe cy’iminsi 60 cyari cyaragenwe kugira ngo Amerika na Iran biganire ku buryo bwo guhagarika amakimbirane kirangiye nta masezerano mashya agerwaho.
Ibiganiro byari binagamije gushakira igisubizo ikibazo cy’Inzira ya Hormuz no kugabanya umwuka mubi hagati y’ibihugu byombi.
Kugeza ubu, impande zombi ziracyashinjanya kuba intandaro yo kudindiza inzira y’amahoro, mu gihe ikibazo cya Hormuz gikomeje kugira ingaruka ku gutwara peteroli n’ibindi bicuruzwa ku rwego mpuzamahanga. Iyo nzira ni ingenzi cyane kuko ari umwe mu mihora ikomeye ikoreshwa mu kugeza peteroli ku masoko yo ku isi.
Kwamamaza ko nta biganiro biteganyijwe bishobora kongera impungenge z’uko amakimbirane hagati ya Washington na Tehran ashobora gukomeza igihe kirekire, cyane cyane mu gihe ikibazo cy’Inzira ya Hormuz kitarabonerwa umuti urambye.
Rwandatribune.rw
