Perezida wa Ukraine, Volodymyr Zelensky, yatangaje ko Ukraine n’u Budage biri hafi kurangiza inyandiko y’amasezerano y’ubufatanye mu gukora no guteza imbere drones, azwi nka “Drone Deal”.
Zelensky yabivuze ku wa Gatatu nyuma y’ikiganiro yagiranye kuri telefoni na Chancellor w’u Budage, Friedrich Merz.
Yavuze ko amakipe y’impande zombi ageze ku cyiciro cya nyuma cyo gutegura inyandiko y’ayo masezerano.
Aya masezerano agamije kwagura umusaruro uhuriweho wa drones, misile n’ikoranabuhanga rya gisirikare, ndetse no kongera ubushobozi bw’ibihugu byombi mu bijyanye no kwirinda no gucunga umutekano.
Zelensky na Merz kandi bemeranyije kuzahura imbonankubone mu minsi iri imbere, mu gihe u Budage buteganya kugeza muri Ukraine ibindi bikoresho byo kurinda ikirere muri Nzeri.
Ubufatanye bumaze gutanga imishinga
Ubufatanye bwa gisirikare hagati ya Ukraine n’u Budage busanzwe burimo imishinga itandukanye.
Berlin iri gutera inkunga gahunda yo gukora no kugura drones Ibihumbi 50,000 zo mu bwoko bwa Shrike FPV, zakozwe n’uruganda rwo muri Ukraine rwa SkyFall, mu masezerano afite agaciro ka miliyoni 90 z’amayero.
U Budage kandi buri gutera inkunga umusaruro wa drones 15,000 zo mu bwoko bwa STRILA, zagenewe kurwanya drones z’ibitero zo mu bwoko bwa Shahed zikoreshwa n’u Burusiya.
Hari n’indi mishinga ijyanye no gukora drones zishobora gufata cyangwa gusenya izindi drones, guteza imbere misile n’indege, ndetse no guhanahana ikoranabuhanga hagati y’inganda zo mu Budage no muri Ukraine.
Muri sosiyete ziri muri iyi mishinga harimo Diehl, FirePoint na Luch.
“Drone Deal” iri mu mugambi mugari wa Ukraine wo kongera ubushobozi bwayo bwo gukora intwaro n’ikoranabuhanga rya gisirikare imbere mu gihugu, aho kwishingikiriza cyane ku ntwaro zihabwa n’abafatanyabikorwa.
Zelensky yari yatangaje muri Kanama ko Ukraine yari imaze kugirana amasezerano nk’aya n’ibihugu icyenda, mu gihe andi masezerano agera kuri 15 yari akiri mu biganiro.
Mu bihugu byamaze gutangaza ubufatanye na Ukraine harimo Lithuania, Latvia, Estonia, u Buholandi, Denmark na Norway, mu gihe ibiganiro n’abandi bafatanyabikorwa bikomeje.
Iyi gahunda yanageze ku Muryango w’Ubumwe bw’u Burayi (EU), watangije gahunda yo gukorana na Ukraine mu bijyanye na drones, ndetse uteganya inkunga igera kuri miliyari imwe y’amayero yo kongera ubushobozi bwa Ukraine mu ikoranabuhanga rya drones.
Ubufatanye bushya hagati ya Kyiv na Berlin, nibusozwa, bushobora gutuma ibihugu byombi byongera ubushobozi bwo gukora drones n’izindi ntwaro mu buryo buhuriweho, mu gihe intambara ya Ukraine n’u Burusiya ikomeje.
Rwandatribune.rw
