Perezida wa Ukraine Volodymyr Zelenskyy yageze muri Leta Zunze Ubumwe za Amerika aho ateganya kugirana ibiganiro na Perezida Donald Trump, mu gihe intambara hagati ya Ukraine n’u Burusiya ikomeje kurangwa n’ibitero by’amadrone no gushaka uburyo bwo kongera ubufasha bwa gisirikare.
Urugendo rwa Zelenskyy rubaye mu gihe impande zombi zikomeje gukoresha amadrone mu bitero bigamije ibirindiro bya gisirikare ndetse n’ibikorwa remezo by’ingenzi. Kyiv ivuga ko ikeneye kongererwa ubushobozi bwo kwirinda ibitero byo mu kirere, mu gihe Moscow ikomeje kugaba ibitero ku bice bitandukanye bya Ukraine.
Abayobozi ba Ukraine bavuga ko ibiganiro bya Zelenskyy na Trump bizibanda ku buryo bwo gukomeza gushyigikira Ukraine, cyane cyane ku bijyanye n’intwaro n’ubufasha bw’ubutasi, ndetse no ku buryo hashobora kuboneka inzira iganisha ku ihagarikwa ry’imirwano.
Ku rundi ruhande, Perezida Trump amaze igihe agaragaza ko ashaka ko intambara irangira binyuze mu biganiro, ariko uburyo Amerika izakomeza kugira uruhare muri iyi ntambara bukomeje gukurikiranwa n’abafatanyabikorwa ba Ukraine.
Urugendo rwa Zelenskyy ruje mu gihe intambara imaze imyaka irenga itatu ikomeje guhungabanya umutekano w’u Burayi, ndetse n’ibihugu by’iburengerazuba bikomeje kuganira ku buryo bwo gufasha Kyiv mu gihe ihangana n’u Burusiya.
Rwandatribune.rw
