Abayobozi bakuru b’Ingabo z’u Rwanda (Rwanda Defence Force) n’iza Tanzania (Tanzania People’s Defence Force) bahuriye mu Karere ka Karagwe mu nama igamije kunoza ubufatanye mu kurinda umutekano ku mipaka ihuza ibihugu byombi, no gushaka ibisubizo ku bibazo bihari by’umutekano muke.
Iyi ni Inama ya 15 ihuza abayobozi b’ingabo zikorera ku mipaka, ikaba yatangiye ku wa Kabiri tariki ya 24 Werurwe 2026, ikazasozwa ku ya 26 Werurwe 2026.
Yitabiriwe na Diviziyo ya Gatanu ya Rwanda Defence Force hamwe na Burigade ya 202 yo mu ngabo za Tanzania People’s Defence Force, zose zifite inshingano zo gukorera mu bice byegereye imipaka ihuza ibi bihugu.
Ku ruhande rw’u Rwanda, itsinda riyobowe na Maj Gen Ruki Karusisi, Umuyobozi wa Diviziyo ya Gatanu, mu gihe ku ruhande rwa Tanzania riyobowe na Brig Gen Gabriel Elias Kwiligwa, uyobora Burigade ya 202.
Ku munsi wa mbere w’iyi nama, abayobozi bombi basuye uduce twegereye umupaka hagamijwe kureba uko umutekano uhagaze no kuganira n’abaturage batuye muri utwo turere. Izi ngendo zagarutse cyane ku gukangurira abaturage kwirinda kwambuka imipaka mu buryo bunyuranyije n’amategeko, ndetse no kwirinda ibikorwa byo kuroba mu mazi asangiwe n’ibihugu byombi mu buryo butemewe.
Mu duce twasuye harimo imidugudu ya Nyarubare na Katwe yo mu Karere ka Kyerwa, ndetse n’umudugudu wa Nyakakoni wo mu Murenge wa Kayisho ku ruhande rwa Tanzania, uhana imbibi n’Umurenge wa Rwimiyaga mu Rwanda. Aka gace kazwiho inzira zinyuranye zitemewe zikoreshwa mu kwambuka, zirimo ibiyaga, inzuzi n’ibishanga, cyane cyane Umugezi wa Akagera.
Abayobozi bagaragaje ko ibi bice bikunze gukoreshwa mu bikorwa bya magendu n’ibindi binyuranyije n’amategeko byambukiranya imipaka.
Basanze hakenewe kongerwa imbaraga mu bufatanye hagati y’impande zombi, hagamijwe gukumira ibyo bikorwa no kurushaho gushimangira umutekano ku mipaka ihuriweho.
rwandatribune.rw
