Ihuriro Alliance Fleuve Congo-M23 (AFC/M23) ryatangaje icyemezo cyo gushyiraho Umukuru w’Ishami ushinzwe Ubutabera n’Uburenganzira bwa Muntu hamwe n’abamwungirije babiri, mu rwego rivuga ko rugamije gukomeza kubaka no gutunganya inzego z’imiyoborere mu bice rigenzura.
Nk’uko bigaragara mu cyemezo No. 115/COORD-POL/AFC-M23/SB/2026, ubuyobozi bwa AFC/M23 buvuga ko bwashingiye ku Itegeko Nshinga rya Repubulika Iharanira Demokarasi ya Congo, ku nyandiko shingiro z’iri huriro ndetse no ku myanzuro ya komisiyo yari ishinzwe gutangiza gahunda yo kongera kubaka urwego rw’ubutabera mu bice bwise “Territoires libérés”.
Icyo cyemezo kivuga ko gushyiraho uru rwego bigamije gufasha abaturage kubona ubutabera, guteza imbere uburinganire imbere y’amategeko no gushyigikira ubwiyunge n’ituze.
Iyi ntambwe ni imwe mu zigaragaza uburyo AFC/M23 ikomeje gushyiraho inzego z’ubutegetsi n’ubuyobozi mu duce igenzura, mu gihe ikibazo cy’uburasirazuba bwa RDC gikomeje gushakirwa umuti binyuze mu nzira za dipolomasi n’ibiganiro by’amahoro.
Ku rupapuro rwa mbere rw’iki cyemezo nta mazina y’abashyizwe muri iyo myanya agaragara; ayo ategerejwe kuba ari ku mapaji akurikira.
Rwandatribune.rw
