Umusaza w’Umunyamulenge witwa Ntore Rugonderani, ufite imyaka 70, bivugwa ko yaburiwe irengero nyuma yo gukurwa iwe mu rugo mu nkambi y’impunzi ya Bwagiriza, mu Ntara ya Ruyigi mu Burundi.
Amakuru yatangajwe n’urubuga Kivu New avuga ko Rugonderani yaba yarafashwe n’abantu bavuga ko ari abakozi b’inzego z’iperereza z’u Burundi, bakamujyana ahantu hataramenyekana.
Nk’uko ayo makuru abivuga, uyu musaza yakuwe iwe mu gitondo cyo ku wa 20 Nzeri 2026, hagati ya saa tatu na saa cyenda, kuva ubwo umuryango we ukaba utarongera kumenya aho aherereye.
Rugonderani aba mu nkambi ya Bwagiriza, aho bivugwa ko ari umwarimu mu itorero rya CADEC rikorera muri iyo nkambi.
Umuryango we, nk’uko Kivu New ibitangaza, ufite impungenge ku mutekano we, kuko kugeza ubu utaramenya aho yajyanywe cyangwa abamufashe.
Iyi nkuru kandi ivuga ko Ntore Rugonderani yaba ari Umunyamulenge wa munani uvugwa ko yaburiwe irengero mu Burundi mu gihe kitaragera ku byumweru bibiri.
Ibi bikomeje gutera impungenge mu Banyamulenge baba mu nkambi z’impunzi zo mu Burundi, cyane cyane ku bijyanye n’umutekano wabo.
Kugeza ubu, nta tangazo ry’inzego z’u Burundi ryemeza ko Ntore Rugonderani yafashwe cyangwa ryasobanuye aho aherereye.
Rwandatribune.rw
