Inkongi y’umuriro yibasiye site icumbikiye abantu bavuye mu byabo ya Kigonze, iherereye mu gace ka Mudzi-Pela, mu Mujyi wa Bunia muri Repubulika Iharanira Demokarasi ya Congo (RDC), ku wa Gatatu tariki ya 23 Nzeri 2026, ahagana saa saba z’amanywa.
Iyi nkongi yibasiye iyi site mu gihe yari imaze iminsi ikorerwamo ibikorwa by’umutekano byo kuyigota no kugenzura abayirimo, byatangiye ku Cyumweru.
Abarimo bari bahatuye bavuga ko amazu yabo y’agateganyo ndetse n’ibindi bikoresho byabo byangijwe n’umuriro.
Mbere y’ibi bikorwa, site ya Kigonze yari icumbikiye abantu bagera ku 19,000, nk’uko imibare yatanzwe n’abari hafi y’aho ibigaragaza.
Icyakora, umubare w’abari basigaye muri iyi site wari umaze kugabanuka cyane nyuma y’uko ibikorwa by’umutekano bitangiye.
Imiryango myinshi yari yatangiye kuhava, bamwe bajya kuba mu miryango yabakiriye, mu gihe abandi basigaye baba hanze nta nzu cyangwa ahandi hantu hizewe bacumbika.
Ku wa Mbere, hari hamaze gutangazwa ko hari imiryango yavuye muri iyi site, mu gihe muri ako gace hari humvikanye amasasu ndetse hakaba haratangajwe n’ifatwa ry’abantu bamwe.
Umwotsi wa mbere w’inkongi wabonetse ahagana saa saba z’amanywa. Abantu bari bamaze kuva muri site, abaturiye ako gace ndetse n’abahisi n’abagenzi bateraniye kure y’aho bareba uko umuriro wari umaze gufata ibice bitandukanye by’iyi site.
Umwe mu bimuwe, ufite imyaka hafi 60, yavuze ko yatahutse avuye mu murima agasanga aho yari acumbitse hamaze gufatwa n’umuriro.
Ati: “Nagarutse mvuye mu murima nsanga aho twacumbikaga hatwitswe. Nari nasizeyo igare ryanjye na matela.”
Undi muntu wari utuye muri iyi site yavuze ko yari aherutse kugura ku giti cye ishashi yari agiye gukoresha asana igisenge cy’aho yari acumbitse, ariko na yo ikaba yarangijwe n’umuriro.
Umwe mu baturiye iyi site yasabye inzego zibishinzwe gutabara byihuse abantu bahavuye mu buryo butunguranye, kuko bamwe batabashije no gutwara imitungo yabo.
Kugeza ubu, ntiharamenyekana uwateje iyi nkongi ndetse n’impamvu yayiteye.
Bamwe mu bantu bari baravuye muri iyi site baganiriye n’abanyamakuru bashinje ingabo za FARDC kuba ari zo zaba zarateje umuriro kugira ngo zibahatire kuva muri Kigonze.
Gusa, nta bimenyetso byigenga byari byagaragajwe bishimangira ibyo birego.
Ku ruhande rw’inzego z’ubuyobozi bw’Intara, kugeza ubu nta tangazo riratangazwa risobanura icyateye inkongi cyangwa ingamba zafashwe mu kurengera abantu bari basanzwe bacumbitse muri iyi site n’imitungo yabo.
Iyi nkongi yabaye ku munsi wa kane w’ibikorwa byo kugota no kugenzura site ya Kigonze, ibikorwa byari byatangiye gutuma imiryango myinshi ihava.
Kugeza ubu kandi, inzego za gisirikare n’ubuyobozi bwite bwa Leta ntizari zatangaza ku mugaragaro umubare w’abahuye n’ingaruka z’ibi bikorwa by’umutekano cyangwa uko byagenze.
Rwandatribune.rw
