Amakuru Minembwe Capital News (MCN) ivuga ko imaze kubona avuga ko mu gitondo cyo kuri uyu wa Gatandatu, ihuriro ry’ingabo za Repubulika Iharanira Demokarasi ya Congo, ririmo FARDC, ingabo z’u Burundi ndetse n’imitwe ya Wazalendo na FDLR, ryagabye igitero mu gace ka Mugwingandura, ariko rikaza guhura n’ibitero bya MRDP-Twirwaneho.
Aya makuru avuga ko imirwano ikomeye yabereye cyane cyane hafi y’Umugezi wa Rwamatenganya, aho MRDP-Twirwaneho ivuga ko yasubije inyuma FARDC n’imitwe yitwaje intwaro yari ishyigikiye.
Ku ruhande rwa MRDP-Twirwaneho, MCN ivuga ko ibikorwa byo kurwana byayobowe na Colonel Best Friend Ndoli Thomas, usanzwe ashinzwe ibikorwa bya gisirikare, uzwi nka G3, muri uwo mutwe.
Amakuru aturuka muri ako gace akomeza avuga ko imirwano yakomeje nyuma y’uko impande zombi zihuriye ku ruzi rwa Rwamatenganya, ndetse ko MRDP-Twirwaneho yakomeje kugaba ibitero ku ngabo za Leta ya Congo n’abafatanyabikorwa bayo.
Kugeza ubu, aya makuru avuga ko imirwano yakomeje kugana mu gace ka Musika.
Icyakora, aya makuru aturuka ku ruhande rumwe rw’abari muri iyi mirwano kandi ntiturabona ubusobanuro bwigenga bwemeza iby’uko urugamba rwagenze cyangwa igihombo cyaba cyarabaye ku mpande zombi.
MCN ivuga ko ikomeje gukurikirana amakuru mashya ajyanye n’iyi mirwano.
Rwandatribune.rw
