Umuhuzabikorwa wa politiki w’Ihuriro AFC, ririmo umutwe wa M23, Corneille Nangaa, yatangaje ko AFC/M23 itazasubira inyuma cyangwa ngo ive ku birindiro ifite, mu gihe intambara n’umwuka mubi wa politiki bikomeje kurangwa mu burasirazuba bwa Repubulika Iharanira Demokarasi ya Congo (RDC).
Nangaa yavuze ko uyu mutwe uzakomeza inzira watangiye, yibutsa aho wavuye n’uduce umaze kugeramo.
“Twavuye i Bunagana. Ubu turi i Goma, i Bukavu no mu cyerekezo cya Maniema,” Nangaa yavuze.
Yongeyeho ko abaturage badakwiye kwita ku makuru avuga ko AFC/M23 ishobora kuva ku birindiro byayo.
“Ndabizeza, mu izina rya AFC/M23, ko nta gusubira inyuma cyangwa kuva ku birindiro bizabaho. Ntimukizere amakuru y’ibihuha,” yavuze.
Aya magambo aje mu gihe amakuru ku mutekano mu burasirazuba bwa RDC akomeje gutangwa mu buryo butandukanye, mu gihe impande zishyamiranye zikomeza gutanga ibisobanuro bitandukanye ku miterere y’ibibera ku butaka.
AFC iyobowe na Corneille Nangaa ihuriza hamwe imitwe ya politiki n’iyitwaje intwaro, harimo M23.
Uyu mutwe umaze kugenzura ibice binini by’uburasirazuba bwa RDC, birimo imijyi ya Goma na Bukavu.
Amagambo ya Nangaa agaragaza ko AFC/M23 ikomeje gushimangira umwanya wayo wa politiki n’uw’umutekano, ndetse ko iteganya gukomeza ibikorwa byayo aho kuba yasubira inyuma.
Mwizerwa Ally
Rwandatribune.rw
