Nyuma y’uko APR FC itomboye Les Aigles du Congo mu ijonjora ribanza rya CAF Champions League, kimwe mu bibazo bikomeje kwibazwa ni niba koko umukino ubanza uzabera i Kinshasa nk’uko byateganyijwe, cyangwa niba CAF ishobora gufata icyemezo cyo kuwimurira ku kibuga kidafite aho gihuriye n’amakipe yombi.
Nta tangazo na rimwe CAF iratanga rivuga ko umukino uzimurwa. Ariko hari ibintu byinshi bishobora gusuzumwa mbere y’uko hafatwa umwanzuro wa nyuma.
Umubano wa Kigali na Kinshasa uracyari ikibazo
Mu myaka ishize, umubano hagati y’u Rwanda na Repubulika Iharanira Demokarasi ya Congo warushijeho kuzamba kubera amakimbirane ashingiye ku mutekano mu Burasirazuba bwa RDC.
Ibi byakurikiwe no gufunga ambasade, guhagarika ingendo zimwe na zimwe ndetse n’imyigaragambyo yabereye i Kinshasa yibasiye inyungu z’u Rwanda.
Nubwo ibyo ari ibibazo bya dipolomasi, bishobora kugira ingaruka ku itegurwa ry’umukino mpuzamahanga uhuza amakipe y’ibihugu byombi.
Hari impungenge ku mutekano wa APR FC
Ikindi gishobora kwitabwaho ni umutekano wa APR FC ubwayo.
APR FC ni ikipe ifitanye isano n’Ingabo z’u Rwanda (RDF), ibintu bishobora gutuma iba mu makipe asuzumwa by’umwihariko mu gihe hari umwuka wa politiki mubi hagati y’ibihugu byombi.
Hari kandi urugero rwabaye ku wa 9 Nzeri 2025, ubwo nyuma y’umukino wo gushaka itike y’Igikombe cy’Isi wahuje RDC na Sénégal kuri Stade des Martyrs, habaye imvururu z’abafana zirimo kwangiza ibikorwaremezo bya stade nyuma y’uko Sénégal itsinze RDC ibitego 3-2.
Nubwo nta kimenyetso cyerekana ko ibintu nk’ibyo byazongera kuba ku mukino wa APR FC, ayo mateka ashobora kuba kimwe mu bintu CAF yifashisha isuzuma urwego rw’umutekano mbere y’umukino.
Ikindi kibazo ni icyorezo cya Ebola kiri muri RDC.
U Rwanda rwashyizeho ingamba zikomeye ku bantu baturuka muri icyo gihugu, ibintu bishobora kugira ingaruka ku ngendo z’abakinnyi, abatoza n’abayobozi b’amakipe, cyane ko umukino ubanza n’uwo kwishyura uteganyijwe gutandukanywa n’icyumweru kimwe gusa.
Amategeko ya CAF na FIFA ateganya iki?
Amategeko ya CAF agenga amarushanwa y’amakipe ateganya ko mu gihe hari impamvu zikomeye zirimo ibibazo by’umutekano, ubuzima rusange cyangwa izindi mpamvu zidasanzwe, CAF ishobora kwemeza ko umukino ukinirwa ku kibuga kidafite aho gihuriye n’amakipe yombi cyangwa mu kindi gihugu.
Icyo cyemezo gifatwa nyuma y’isuzuma ry’imiterere y’ibibazo bihari.
Ku ruhande rwa FIFA, amabwiriza agenga umutekano wa stade asaba ko igihugu cyakira umukino kigomba gutanga icyizere cy’umutekano ku bakinnyi, abasifuzi, abayobozi n’abafana.
Iyo habaye impungenge zikomeye ku mutekano, uwateguye irushanwa aba afite ububasha bwo gufata ingamba zidasanzwe kugira ngo ubuzima n’umutekano by’abaryitabiriye birindwe.
CAF iracyafite ijambo rya nyuma
Kugeza ubu, gahunda ya CAF iracyerekana ko Les Aigles du Congo izakira APR FC i Kinshasa.
Ariko, urebye ibibazo bya dipolomasi hagati y’u Rwanda na RDC, amateka y’imvururu zabaye kuri Stade des Martyrs, impungenge z’umutekano wa APR FC nk’ikipe ifitanye isano n’Ingabo z’u Rwanda, ndetse n’ingaruka z’icyorezo cya Ebola ku ngendo z’amakipe, birashoboka ko CAF izabanza gukora isuzuma ryimbitse mbere yo kwemeza ko umukino ubanza uzabera i Kinshasa cyangwa niba uzimurirwa ku kibuga kidafite aho gihuriye n’amakipe yombi. Nta cyemezo nk’icyo kiratangazwa kugeza ubu.
Rwandatribune.rw
