Perezida wa Repubulika y’u Rwanda, Paul Kagame, yageze i Doha muri Qatar aho yagiye kwifatanya n’Umuyobozi w’Ikirenga w’iki gihugu, Sheikh Tamim bin Hamad Al Thani, n’umuryango we mu muhango wo gusezera bwa nyuma kuri se, Sheikh Hamad bin Khalifa Al Thani.
Sheikh Hamad bin Khalifa Al Thani, wabaye Emir wa Qatar kuva mu 1995 kugeza mu 2013, yitabye Imana afite imyaka 74. Azwiho kugira uruhare rukomeye mu iterambere rya Qatar no kuyihindura igihugu gifite ijambo rikomeye ku rwego mpuzamahanga mu by’ubukungu, itangazamakuru na dipolomasi.
Mbere yo kujya muri Qatar, Perezida Kagame yari yatanze ubutumwa bwo kwihanganisha Sheikh Tamim bin Hamad Al Thani, umuryango we ndetse n’abaturage ba Qatar nyuma y’urupfu rwa se.
Yavuze ko Sheikh Hamad azibukwa nk’umuyobozi waranzwe n’icyerekezo ndetse n’umurage wo guteza imbere igihugu cye no guteza imbere umubano hagati y’ibihugu.
Uru ruzinduko rwa Perezida Kagame muri Qatar rubaye mu gihe ibihugu byombi bisanzwe bifitanye umubano mu nzego zitandukanye, zirimo ubucuruzi, ishoramari n’ubufatanye mu bya dipolomasi.
rwandatribune.rw
