Umuryango wa Juvenal Habyarimana, wahoze ari Perezida w’u Rwanda, uravuga ko bamwe mu bawugize bagabweho ibitero by’ikoranabuhanga, birimo kwinjirwa mu mbuga nkoranyambaga no gufungurirwa konti z’amafaranga mu mazina yabo.
Marie Rose Habyarimana, umukobwa wa Juvenal Habyarimana, yabivuze mu kiganiro cyanyuze ku miyoboro y’ibitangazamakuru bitavuga rumwe n’ubutegetsi bw’u Rwanda.
Marie Rose yavuze ko abantu atavuze amazina binjiye muri konti za murumuna we, Jean Luc Habyarimana, iza mushiki we Jeanne Habyarimana ndetse n’iz’abandi bo mu muryango.
Mu konti avuga ko zibasiwe harimo izikoreshwa kuri WhatsApp, Facebook na X (Twitter).
Marie Rose Habyarimana kandi yavuze ko hari izindi konti zafunguwe mu mazina y’abagize umuryango wa Habyarimana, zikaba zarakoreshejwe mu gukusanya amafaranga yari agamije gufasha imitwe yitwaje intwaro ikorera mu Burasirazuba bwa Repubulika Iharanira Demokarasi ya Congo.
Nta makuru yigenga ahari muri iki kiganiro yemeza uwaba ari inyuma y’ibyo bikorwa cyangwa ngo agaragaze niba koko amafaranga yakusanyijwe yaragejejwe ku mitwe ivugwa.
Abasesenguzi babihuza n’ubutumwa bwa politiki
Ku rundi ruhande, bamwe mu basesenguzi ba politiki bavuga ko ibivugwa kuri ibi bitero bishobora no kurebwa mu rwego rw’uburyo umuryango wa Habyarimana Juvenal ukomeza gutambutsa ubutumwa bwa politiki.
Aba basesenguzi bavuga ko ibi bishobora kuba bigamije kongera abashyigikira imitwe irwanya Leta y’u Rwanda, by’umwihariko FDLR.
Ibi babihuza n’amagambo Jean Luc Habyarimana aherutse kuvuga, aho yagaragaje ko ashyigikiye FDLR, umutwe Leta y’u Rwanda ishinja kuba ugizwe ahanini n’abasize bakoze Jenoside yakorewe Abatutsi mu 1994.
Jean Luc Habyarimana n’ingendo muri Congo n’u Burundi
Jean Luc Habyarimana kandi yagiye avugwa mu bikorwa byo gushaka guhuza imitwe yitwaje intwaro ikorera mu karere k’Ibiyaga Bigari.
Mu bihe bitandukanye, yagiye akora ingendo mu Burundi no muri Repubulika Iharanira Demokarasi ya Congo, aho bivugwa ko yagiye ahura n’abantu bafite aho bahuriye n’imitwe nka FDLR, RUD-Urunana na CNRD/FLN.
Iyi mitwe yose yagiye ishyirwa mu murongo w’imitwe ifite inkomoko ku bantu bahoze mu ngabo za Leta ya mbere ya Jenoside yakorewe Abatutsi, FAR n’abari muri Interahamwe.
Vuba aha kandi, Jean Luc Habyarimana yavuzweho guhura na Lt. Gen. Victor Byiringiro, umwe mu bayobozi bakuru ba FDLR, ku cyicaro cy’uyu mutwe mu gace ka Pinga, muri Repubulika Iharanira Demokarasi ya Congo.
Icyakora, ku bijyanye n’ibitero by’ikoranabuhanga bivugwa na Marie Rose Habyarimana, hakenewe andi makuru yigenga kugira ngo hamenyekane neza uwabigizemo uruhare, igihe byabereye ndetse n’ingano y’amafaranga yaba yarakusanyijwe hifashishijwe izo konti.
Mwizerwa Ally
Rwandatribune.rw
