Minisitiri w’Ububanyi n’Amahanga n’Ubutwererane w’u Rwanda, Olivier Nduhungirehe, yanenze igikorwa cy’Umudepite wo muri Repubulika Iharanira Demokarasi ya Congo (RDC) wagaragaye mu mashusho ahatira umusore wo i Kinshasa kwiyambura umupira wa Arsenal FC wari wanditseho ‘Visit Rwanda’.
Ni amashusho yakwirakwiye ku mbuga nkoranyambaga, agaragaza uyu Mudepite asaba uwo musore gukuramo uwo mupira kubera ko wariho ikirango cya gahunda ya ‘Visit Rwanda’, ikirango u Rwanda rukoresha mu kwamamaza ubukerarugendo no guteza imbere isura yarwo ku rwego mpuzamahanga.
Minisitiri Nduhungirehe yanenze iki gikorwa, ashimangira ko siporo idakwiye kuba isoko y’amacakubiri, urwango cyangwa ivangura rishingiye ku bwenegihugu.
Yavuze ko abaturage bo mu Karere k’Ibiyaga Bigari bakwiye kugira uburenganzira bwo kubaho mu mahoro no mu bwisanzure, harimo no kugira uburenganzira bwo gushyigikira ikipe y’umupira w’amaguru bahisemo.
Nduhungirehe yashimangiye ko nta muntu ukwiye gutotezwa cyangwa guhezwa kubera igihugu akomokamo, ubwoko, idini cyangwa ikipe y’umupira w’amaguru afana.
‘Visit Rwanda’ ikomeje kugaragara muri siporo mpuzamahanga
‘Visit Rwanda’ imaze imyaka igaragara mu bufatanye n’amakipe akomeye yo ku mugabane w’u Burayi, mu rwego rwo kumenyekanisha u Rwanda n’ubukerarugendo bwarwo.
U Rwanda rwigeze kugira ubufatanye na Arsenal FC, aho ikirango ‘Visit Rwanda’ cyagaragaraga ku myambaro y’ikipe.
Ubu bufatanye bwamaze imyaka umunani, aho Arsenal yanegukanye Shampiyona y’u Bwongereza mu mwaka w’imikino wa 2025/26, ibintu Nduhungirehe yavuze ko byashimishije Abanyarwanda n’abakunzi b’iyi kipe.
Muri iki gihe, u Rwanda rukomeje no kugira ubufatanye n’andi makipe akomeye.
Minisitiri Nduhungirehe aherutse kwakira umukinnyi w’Umunyekongo Aaron Wan-Bissaka nyuma yo kwerekeza muri Aston Villa, ikipe na yo ifitanye ubufatanye na ‘Visit Rwanda’.
Ku bwa Nduhungirehe, kuba umuntu afana ikipe runaka cyangwa akambara umupira wanditseho ikirango runaka, ntibikwiye kuba impamvu yo kumutoteza cyangwa kumubuza uburenganzira bwe bwo kwishimira siporo.
Ibi bibaye mu gihe umupira w’amaguru ukomeje kugira uruhare rukomeye mu mibanire n’imikorere y’ibihugu byo mu Karere k’Ibiyaga Bigari, aho amakimbirane ya politiki n’umutekano hagati y’u Rwanda na RDC akomeje kugira ingaruka no mu bikorwa bya siporo.
Rwandatribune.rw
