Ibikorwa bya politiki muri Repubulika Iharanira Demokarasi ya Congo (RDC) bikomeje kwibanda ku mushinga w’ibiganiro bihuza impande zose (Dialogue National Inclusif) watangijwe na Perezida Félix Tshisekedi nyuma y’inama yagiranye ku wa Gatanu tariki ya 17 Nyakanga n’abayobozi b’amadini n’amatorero bari bayobowe na Kardinali Fridolin Ambongo.
Ku wa Gatandatu tariki ya 18 Nyakanga, Inama y’Abepisikopi Gatolika muri Congo (CENCO) n’Itorero rya Kristo muri Congo (ECC) batangiye urugendo rwo kugisha inama imitwe ya politiki n’izindi nzego zitandukanye ku bijyanye n’ibi biganiro by’igihugu.
Mu cyiciro cya mbere cy’ibiganiro, abayobozi b’amadini bahuye n’abahagarariye ihuriro ry’abatavuga rumwe n’ubutegetsi rya C64.
Baganiriye ku rugendo rwo kwigaragambya ruteganyijwe ku wa 22 Nyakanga rugamije gusaba Perezida Félix Tshisekedi kwegura.
Abayobozi ba C64 batangaje ko icyemezo cyo gusubika cyangwa guhagarika imyigaragambyo gishobora gutangazwa ku wa Mbere tariki ya 20 Nyakanga, nyuma y’inama y’abayobozi b’imitwe itavuga rumwe n’ubutegetsi.
Umuvugizi wa ECC, Pasiteri Eric Senga, yavuze ko impande zombi zagize ibiganiro byubaka, aho abatavuga rumwe n’ubutegetsi bibanze ku gusobanukirwa uko ibiganiro bihuza bose bizakorwa n’icyo bivuze mu buryo bw’imikorere yabyo.
Yagize ati: “Batubajije ibibazo bifatika, cyane cyane ku bijyanye n’uburyo ibiganiro bizaba birimo buri ruhande (inclusivité), banabaza icyo bizasobanura ku hazaza h’Itegeko Nshinga.”
Ihuriro C64 ryashinzwe n’abatavuga rumwe n’ubutegetsi hagamijwe kwamagana no gukumira umushinga wa Guverinoma wo kuvugurura Itegeko Nshinga.
Pasiteri Eric Senga yavuze ko inshingano bahawe nk’abahuza ari ugufasha Abanyekongo kwiyunga no guhuriza hamwe abana b’igihugu bose mu rwego rw’ibiganiro birangwa n’amahoro, ubwumvikane n’ubwubahane, kugira ngo ibibazo byose bireba inyungu rusange byiganirweho.
Abahuza kandi batangaje ko bazakomeza kugisha inama n’ibindi byiciro bigize urubuga rwa politiki ndetse n’imiryango itandukanye y’abaturage, mbere y’uko ibiganiro nyirizina bitangira.
Rwandatibune.rw
