Umunya-Congo wegukanye igihembo cy’Amahoro cyitiriwe Nobel, Dr Denis Mukwege, yamaganye ishyirwaho ry’abayobozi bashya b’amashuri makuru na za kaminuza n’imitwe ya AFC/M23 mu bice bya Kivu y’Amajyaruguru n’Amajyepfo, ndetse anenga icyemezo cyo guhagarika amasomo muri ibyo bice.
Mu itangazo yasohoye ku wa Gatatu tariki ya 26 Kanama 2026, Mukwege yavuze ko ibi bikorwa birushaho kuremerera abaturage bo muri Kivu y’Amajyaruguru n’Amajyepfo, bamaze igihe bahura n’ingaruka z’intambara n’umutekano muke.
Mukwege yavuze ko nyuma y’ifungwa ry’ibibuga by’indege, amabanki, kugabanywa kw’ubutabazi n’imbogamizi ku ngendo z’abaturage, guhagarika ibikorwa bya kaminuza ari ikindi kibazo gikomeye cyiyongera ku buzima bw’abaturage.
Yagize ati: “Nyuma yo gufunga ibibuga by’indege, amabanki, kugabanya ubutabazi n’ingendo z’abaturage, gufunga za kaminuza birushaho gukomeza igitutu ku Banyekongo bagera kuri miliyoni 12 bo muri Kivu y’Amajyaruguru n’Amajyepfo basigaye mu bibazo byabo.”
Uyu muganga yavuze ko guhagarika uburezi bibangamira cyane urubyiruko, kuko bibambura amahirwe yo kwiga, kwihugura no gutegura ejo hazaza habo.
Mukwege yavuze ko kubangamira uburenganzira bw’urubyiruko bwo kwiga no kugera ku nzozi zarwo ari umurongo utukura udakwiye kurengerwa.
Asaba ko uburezi bushyirwa imbere
Dr Denis Mukwege yasabye inzego za Leta n’abatari iza Leta zose ziri mu bikorwa byo gushaka igisubizo ku ntambara iri muri Repubulika Iharanira Demokarasi ya Congo, gushyira uburezi bw’abana b’Abanyekongo mu byihutirwa.
Yanasabye ko urubyiruko ruhabwa uruhare rugaragara mu gufata ibyemezo bireba ubuzima n’ejo hazaza harwo.
Mukwege kandi yasabye ko habaho ihagarikwa ry’ibikorwa bya gisirikare no gukoresha amashuri n’amashuri makuru mu nyungu za politiki, asaba ko imiyoborere y’ibigo by’uburezi idakwiye kugengwa n’imitwe yitwaje intwaro.
Ashaka ko amasomo asubukurwa mu buryo bwizewe
Uyu muganga yasabye ko amasomo asubukurwa mu buryo bwizewe mu bice byose bya Repubulika Iharanira Demokarasi ya Congo, harimo n’ibice biri mu maboko y’imitwe yitwaje intwaro.
Ku bwa Mukwege, ejo hazaza h’urubyiruko ntihakwiye kuba igikoresho cyo guhererekanya mu biganiro bya politiki cyangwa mu makimbirane ashingiye ku butaka.
Yavuze ko urubyiruko rudakwiye gufatwa nk’“igihombo cy’inyongera” cy’intambara, ahubwo ko uburezi bwabo bugomba kurindwa no guhabwa agaciro mu gushaka umuti urambye w’ikibazo cya Congo.
Rwandatribune.rw
