Abayobozi n’abahagarariye imwe mu mitwe yitwaje intwaro izwi nka Wazalendo, ikorera mu bice bya Uvira, Fizi na Itombwe muri Kivu y’Amajyepfo, bivugwa ko batangiye gufatwa no gufungirwa i Kinshasa n’inzego z’ubutasi za Repubulika Iharanira Demokarasi ya Congo (RDC).
Amakuru atangazwa n’umunyamakuru Byobe Malenga Avuga ko mu bantu bavugwa muri iri fatwa harimo Prince Kasikuza na Samadari, bari bamaze igihe kirenga ukwezi i Kinshasa.
Aba bayobozi bari baragiye i Kinshasa mu rwego rwo gusaba ko abahagarariye imitwe yabo bagira uruhare mu biganiro by’igihugu Perezida wa RDC yatangaje ko bigomba kubera mu gihugu.
Amakuru aturuka mu nzego z’umutekano avuga ko abamaze gufatwa bakurikiranweho ibyaha birimo ubuhemu, gukorana cyangwa kugira imikoranire n’inyeshyamba za M23/ARC, ndetse no kunyereza amafaranga yari agenewe ibikorwa bya gisirikare.
Prince Kasikuza, nk’uko ayo makuru abivuga, yaba ashinjwa kuba yaratanze amakuru y’ibinyoma ku kuba ari ku rugamba kandi atariho. Samadari na we ari mu bayobozi bavugwa ko bafashwe.
Abandi bantu bavugwa muri iri fatwa ni Meshack, Justin, Aimable Namulizi, Clovis na Gabriel.
Nubwo aya makuru amaze gukwirakwira, inzego za Leta ya RDC ntiziratangaza ku mugaragaro ko aba bantu bafashwe cyangwa ngo zisobanure ibyo bakurikiranweho. Ku bw’ibyo, ibirego bivugwa kuri bo ntibiratangazwa nk’ibyemejwe n’ubutabera.
Ku rundi ruhande, amakuru avuga ko intumwa za CNPSC ya Amuri ya Kutumba zikiri i Kinshasa kandi ko zikomeje gahunda zazo uko bisanzwe. Ibi bivuguruzanya n’ibihuha byari bimaze gukwirakwira bivuga ko na zo zaba zafashwe.
Iri fatwa rivugwa ry’abahagarariye Wazalendo rije nyuma y’uko umujenerali wiyise “Fyeka Adui” na we atangiye gufatwa i Uvira, nyuma akajyanwa ahantu hatazwi kugeza ubu.
Ibikorwa nk’ibi biri gutuma hibazwa ku hazaza h’imikoranire hagati y’inzego za Leta ya RDC n’imitwe ya Wazalendo, cyane cyane ku bijyanye n’imiyoborere y’abo barwanyi n’uruhare rwabo ku rugamba aho bahanganye n’imitwe y’inyeshyamba.
Rwandateibune.rw
