Muri Repubulika Iharanira Demokarasi ya Congo (RDC) — Ubuyobozi bwa politiki bw’umuryango wa AFC/M23 bwagiranye ibiganiro n’intumwa z’umuryango Médecins Sans Frontières (MSF) Belgium, bigamije kurebera hamwe uko ibikorwa by’ubutabazi n’ubuvuzi byakomeza gukorwa mu bice biri mu maboko y’uyu mutwe.
AFC/M23 yari ihagarariwe na Corneille Nangaa na Bertrand Bisimwa, mu gihe ibiganiro byibanze ku buryo serivisi z’ubuvuzi zakomeza kugera ku baturage, ingendo z’abakozi b’imiryango itanga ubutabazi, imikoreshereze y’imipaka ndetse no kugeza imiti n’ibindi bikoresho by’ubuvuzi aho bikenewe.
Mu nama, MSF yagaragaje uburyo bwashyizweho ku bufatanye n’Ibiro by’Umuryango w’Abibumbye bishinzwe ibikorwa by’ubutabazi (OCHA) hamwe n’Ishami ry’Umuryango w’Abibumbye ryita ku Buzima (OMS/WHO), bugamije kugena no koroshya ingendo z’abakozi bayo hagati ya Grand Nord n’ibindi bice birebwa n’ibi bikorwa.
Ibi biganiro byabaye mu gihe RDC ikomeje guhangana n’icyorezo cya Ebola, bikaba byaratumye ingendo z’abakozi b’ubuzima n’ubutabazi zishyirwaho amabwiriza yihariye kugira ngo ibikorwa byo kurwanya iki cyorezo bikomeze.
Ku ruhande rwa AFC/M23, ubuyobozi bwa politiki bw’uyu muryango bwongeye kugaragaza ko bwiteguye korohereza ibikorwa by’imiryango itanga ubutabazi no gufasha abaturage kubona serivisi z’ubuvuzi.
AFC/M23 yavuze ko iyi myumvire igamije gufasha abaturage bagizweho ingaruka n’ibibazo biri mu burasirazuba bwa RDC gukomeza kubona ubuvuzi n’izindi serivisi z’ibanze, ndetse no gutuma ibikorwa by’ubutabazi bikomeza nta nkomyi.
Rwandatribune.rw
