Ubucukuzi bwa coltan yo mu birombe bya Rubaya, muri Teritwari ya Masisi mu Ntara ya Kivu y’Amajyaruguru, bukomeje kuba intandaro y’impaka mu bibazo by’umutekano mu burasirazuba bwa Repubulika Iharanira Demokarasi ya Congo (RDC).
Ubufaransa bwatangaje ko umutwe wa M23 ukoresha umusaruro w’iyi myunyungugu mu kwiyubaka, busaba Umuryango w’Abibumbye (Loni) kongera imbaraga mu kurwanya ubucukuzi n’ubucuruzi butemewe bw’umutungo kamere.
Mu nama yo ku rwego rwo hejuru y’akanama k’umutekano ka Loni yabaye ku wa 22 Nyakanga 2026, yibanze ku isano iri hagati y’umutungo kamere n’amahoro, uhagarariye Ubufaransa muri Loni, Jay Dharmadhikari, yavuze ko ubucukuzi n’icuruzwa ritemewe ry’umutungo kamere ari bimwe mu bintu bikomeza amakimbirane hirya no hino ku isi.
Yagaragaje ko iki kibazo kigaragara mu bihugu birimo RDC, Repubulika ya Centrafrique, Sudani, Kolombiya na Myanmar, aho yavuze ko kwiharira umutungo kamere n’imitwe yitwaje intwaro bituma abaturage ari bo bahura n’ingaruka zikomeye.
Ubufaransa bushinja M23 kugenzura umusaruro wa coltan
Mu kuvuga ku kibazo cyo mu burasirazuba bwa RDC, umudipolomate w’Ubufaransa yavuze ko M23 igenzura igice kinini cy’ubucukuzi bwa coltan bukorerwa mu kirombe cya Rubaya.
Yagize ati: “M23 igenzura hagati ya 15% na 30% by’umusaruro wa coltan ku isi ikoresheje ubucukuzi bwa Rubaya, ibyo bikayifasha gutera inkunga ubuyobozi bwayo butemewe, binyuranyije n’ubusugire n’ubutaka bwa RDC.”
Ubufaransa buvuga ko ikoreshwa ry’umutungo kamere mu buryo butemewe ari kimwe mu bintu bikomeye bituma amakimbirane akomeza ndetse bigafasha imitwe yitwaje intwaro kubona amafaranga.
Loni yasabwe gukaza ibihano
Mu rwego rwo guhangana n’iki kibazo, Paris yasabye Akanama k’Umutekano ka Loni gukoresha neza ibikoresho bihari birimo komisiyo z’impuguke n’ibihano bishyirwaho ku bantu cyangwa imitwe ishinjwa guhungabanya amahoro.
Ubufaransa bwibukije ko Loni iherutse gufatira ibihano abantu n’amatsinda bifitanye isano n’imitwe yitwaje intwaro ikorera mu burasirazuba bwa RDC, harimo M23, FDLR na ADF.
Jay Dharmadhikari yavuze ko hakenewe kandi kongerwa imbaraga mu gukurikirana inkomoko y’imyunyu ngugu no gushyiraho uburyo burushaho kugaragaza ukuri ku icuruzwa ryayo.
Yavuze ko hakwiye gukomeza gukoreshwa uburyo mpuzamahanga burimo Processus de Kimberley, amabwiriza ya OECD, imikoranire y’Ibihugu byo mu Karere k’Ibiyaga Bigari (CIRGL) ndetse n’Ubunyamuryango bwo guteza imbere gukorera mu mucyo mu bucukuzi bw’amabuye y’agaciro (ITIE).
Ubufaransa bwongeye gushimangira ko buri gihugu gifite uburenganzira ku mutungo kamere wacyo kandi ko ugomba gukoreshwa mu guteza imbere abaturage.
Paris yavuze ko ishigikiye intego ya RDC yo kunoza imiyoborere y’umutungo kamere no guhuza gahunda mpuzamahanga zigamije kurwanya ubucukuzi butemewe.
RDC ifite amabuye menshi y’agaciro afatwa nk’ay’ingenzi ku rwego rw’isi, harimo coltan ikoreshwa mu gukora ibikoresho by’ikoranabuhanga.
Icyakora, ubucukuzi n’icuruzwa ritemewe ry’ayo mabuye bikomeje gushinjwa kugira uruhare mu gukomeza umutekano muke mu ntara z’iburasirazuba bw’iki gihugu.
Ibi bibaye mu gihe RDC ikomeje ibiganiro n’abafatanyabikorwa mpuzamahanga ku bijyanye n’imicungire y’imyunyu ngugu y’ingenzi, ndetse n’amasezerano ya Washington yashyizweho umukono hagati ya Kinshasa na Kigali agamije gushakira umuti ibibazo by’umutekano n’ubukungu byo mu Karere k’Ibiyaga Bigari.
Rwandatribune.rw
